1. Зошто во лето протекува вода од внатрешната, а во зима од надворешна единица на клима-уредот?

Водата всушност претставува кондензат кој се создава на студените делови на клима-уредот. Во лето кога клима-уредот се користи за ладење, внатрешната едниница е студена, па во неа се кондензира влагата од воздухот, а во зима, кога клима-уредот се користи за греење, надворешната единица е студена, па во влажните денови почнува од неа да прокапува вода. Вкупното количеството на вода кое ќе прокапе зависи од влагата во воздухот и од моќноста на уредот, па така во во лето може да изнесува и до 2 литри на час.


2. Зошто клима-уредот кога се користи за греење понекогаш престанува со работа и прави карактеристичен звук?

Тоа се случува во моментот кога климата е во режим на одледување – т.н. дефрост. Тоа е нормален циклус до кој доаѓа кога надворешните температури се ниски и кој служи да се ослободи надворешната единица од евентуален лед кој на неа се насобрал. Обично трае 3-4 минути и се повторува на еден час, но сепак ова зависи од моделот и квалитетот на клима уредот.


3. Која е разликата меѓу класичен клима-уред и инвертер?

Инвертер е клима-уред кој има електронски управуван компресор, со што е овозможено електронско управување на бројот на вртежите и притисоците со кои работи. За разлика од класичните клима-уреди, кај кои се подесува зададена температура која понатаму е температура според која термостатот исклучува и вклучува, инвертерот работи на повеќе режими, па така како се приближува до посакуваната температура, се намалува притисокот во компресорот и потрошувачката на електрична енергија. На тој начин се добива и до 30% поекономична работа, а и помало оптоварување на електричната инсталација поради постојаното вклучување и исклучување на компресорот.


4. Зошто од внатрешната единица на клима-уредот се слуша повремено пуцкање?

Ова се случува поради дилатација на пластиката. Кога клима уредот ќе ја постигне зададена температура, само надворешната единица престанува со работа, а внатрешната продолжува да го рециркулира воздухот. Со промена на температурата на куќиштето, доаѓа до ширење или стеснување на пластиката што произведува карактеристичен звук.


5. Зошто понекогаш клима-уредот има непријатен мирис?

Причината може да се најде во бактериите кои преку лето се насобрале на испарувачот, по што треба испарувачот да се дезинфицира.